Muchanan i hóbennan na Boneiru, Saba, i Sint Eustatius tin derecho riba bon enseñansa, meskos ku nan kompañeronan di mesun edat den resto di Hulanda. Konseho di Enseñansa ta konstatá ku e derecho aki ainda no ta sufisientemente garantisá den práktika. E Konseho ta konsehá Minister di Enseñansa, Kultura i Siensia pa aliniá legislashon, maneho, i implementashon mihó ku e sirkunstansianan spesífiko den kua ta realisá enseñansa riba e islanan. Esei ta rekerí èkstra esfuerso i finansiamentu. E Konseho ta rekomendá pa e organisashon di enseñansa na Boneiru, Saba, i Sint Eustatius pa tene mas kuenta ku e diferente trayektonan pa futuro ku hóbennan di e islanan ta sigui, i pa organisashonnan di enseñansa wòrdu sostené strukturalmente.

Mas ku diessinku aña pasá, enseñansa na Boneiru, Saba, i Sint Eustatius a bira parti di e sistema di enseñansa hulandes. Ku e publikashon Enseñansa na Hulanda Karibense, Konseho di Enseñansa ta duna un análisis amplio di e funshonamentu di e sistema di enseñansa hulandes riba e islanan. Riba petishon di Minister di OCW, e Konseho ta eksplorá kiko ta nesesario pa realisá bon enseñansa den kuadro di e sistema ei.

Desaroyá un enfoke dirigí pa bon enseñansa

Minister di OCW ta responsabel pa bon enseñansa na tantu Hulanda Karibense komo Hulanda Europeo. Pa kumpli ku e responsabilidat igual aki, e Konseho ta konsehá pa desaroyá un enfoke dirigí ku por respondé mihó na e sirkunstansianan spesífiko na Boneiru, Saba, i Sint Eustatius. Na Hulanda Karibense ta duna enseñansa den un ambiente na eskala chikí, insular na un distansia grandi for di e parti Europeo di Hulanda. E prekondishonnan pa duna bon enseñansa den kuadro di e sistema di enseñansa hulandes ta falta. Debí na e lokalidat remoto, organisashonnan di enseñansa na Hulanda Karibense tin akseso mas limitá na e instrumentonan, rekursonan, i sosten for di Hulanda Europeo na kua organisashonnan di enseñansa na Hulanda Europeo sí tin akseso.

No mester hasi vulnerabilidatnan struktural un problema pa organisashonnan di enseñansa individual. P’esei e Konseho ta konsehá e Minister pa garantisá sosten sostenibel pa organisashonnan di enseñansa riba e islanan den forma di finansiamentu básiko mas haltu i medidanan dirigí i práktiko. Banda di esei, legislashon di enseñansa i esfuersonan di maneho mester ta mihó aliniá ku e sirkunstansianan i nesesidatnan riba e islanan.

Beeld: © Onderwijsraad

Garantisá preparashon pa e vários trayektonan pa futuro di alumnonan i studiantenan

E Konseho ta rekomendá pa Minister tene mas kuenta ku e diferente trayektonan pa futuro di hóbennan ora di strukturá enseñansa na Boneiru, Saba, i Sint Eustatius, pa asina nan por progresá ku éksito pa sigui enseñansa superior òf empleo riba e isla, den region di Karibe, òf na Hulanda Europeo. Por ehèmpel, hóbennan aktualmente tin derecho di studia na Hulanda Europeo, pero den práktika nan ta topa ku opstákulonan, manera insufisiente e dominio rekerí di idioma hulandes i e konekshon limitá entre enseñansa na ingles na Saba i Sint Eustatius (enseñansa CXC) i enseñansa superior. E Konseho ta rekomendá pa hisa e nivel di enseñansa di idioma hulandes i hasi posibel un diferensiashon mas grandi den enseñansa di idioma.

Banda di esei e Konseho ta boga pa fortalesé i sostené mihó finansieramente oportunidatnan pa transishon denter di region di Karibe, den Reino, i entre Boneiru, Saba, i Sint Eustatius. E rutanan aki por ofresé alternativanan prometedor pa studia na Hulanda Europeo. E énfasis mas grandi aktualmente ta wòrdu poní riba e último ruta aki, tantu den enseñansa mes komo den e sosten (finansiero).

Pèrmití organisashonnan di enseñansa na Boneiru, Saba, i Sint Eustatius kumpli ku nan responsabilidatnan

E preshon riba e personal di enseñansa na e islanan ta oumentando, e rotashon ta haltu, i vakaturanan ta difísil pa yena. Ademas, organisashonnan di enseñansa ta konfrontando asuntunan edukativo i di sosten mas kompleho debí na un poblashon di alumno i studiante ku ta oumentando den tamaño i diversidat. E Konseho ta rekomendá pa Minister duna sosten struktural na organisashonnan di enseñansa na Boneiru, Saba, i Sint Eustatius den reklutamentu i inkorporashon di personal di enseñansa, i fasilitá formashon i kompartimentu di konosementu den i entre timnan di enseñansa.

E Konseho tambe ta rekomendá pa oumentá kalidat i kantidat di atministradónan di enseñansa i lidernan di skol na e islanan. Atministradónan di enseñansa i lidernan di skol por ta mihó ekipá ku programanan di desaroyo di maneho, programanan di inkorporashon mehorá, i e establesimentu di un ofisina di sosten.

Tokante e publikashon Enseñansa na Hulanda Karibense

E publikashon Enseñansa na Hulanda Karibense ta konsistí di tres parti:

  • Parti A: Konklushonnan i rekomendashonnan
  • Parti B: Temanan resaltá na Boneiru, Saba, i Sint Eustatius
  • Parti C: Informashon di fondo

Den parti B, e Konseho ta duna un bista mas detayá di e funshonamentu di e sistema di enseñansa na e islanan basá riba e seis temanan. E parti aki a wòrdu realisá den estrecho kooperashon ku e komishonnan insular establesí pa e meta aki, konsistiendo di personanan ku ta traha den enseñansa riba e islanan.